ᱜᱚᱣᱨᱤᱜᱚᱸᱡᱽ ᱨᱮ ᱖᱐ ᱥᱚᱱᱛᱷᱟᱞᱤ ᱪᱮᱛᱮᱫᱤᱭᱟᱹ ᱠᱚ ᱵᱤᱱ-ᱜᱚᱱᱚᱝ ᱛᱮ ᱥᱚᱱᱛᱷᱟᱞᱤ ᱵᱚᱨᱱᱚᱢᱟᱞᱟ ᱯᱩᱛᱷᱤ ᱦᱟᱹᱴᱤᱧ ᱥᱟᱹᱛ ᱮᱱᱟ
ᱠᱩᱧᱡᱤᱵᱟᱨᱤ। ᱡᱷᱟᱯᱟ ᱨᱮᱱᱟᱜ ᱜᱚᱣᱨᱤᱜᱚᱸᱡᱽ ᱜᱟᱶᱯᱟᱞᱤᱠᱟ–᱑, ᱠᱩᱧᱡᱤᱵᱟᱨᱤ ᱨᱮ ᱢᱮᱱᱟᱜ ᱥᱨᱤ ᱵᱟᱞ ᱠᱚᱞᱭᱟᱬ ᱢᱟᱫᱷᱭᱚᱢᱤᱠ ᱵᱤᱫᱽᱭᱟᱞᱚᱭ ᱨᱮ ᱖᱐ ᱡᱚᱬ ᱥᱚᱱᱛᱷᱟᱞ ᱪᱮᱛᱮᱫᱤᱭᱟᱹ ᱠᱚ ᱵᱤᱱ-ᱜᱚᱱᱚᱝ ᱛᱮ ‘ᱥᱚᱱᱛᱷᱟᱞᱤ ᱵᱚᱨᱱᱚᱢᱟᱞᱟ’ ᱯᱩᱛᱷᱤ ᱦᱟᱹᱴᱤᱧ ᱟᱠᱟᱫ ᱠᱚᱣᱟ ᱾
ᱥᱚᱱᱛᱷᱟᱞᱤ ᱚᱞ ᱪᱤᱠᱤ ᱞᱤᱯᱤ ᱯᱟᱲᱦᱟᱣ ᱟᱞᱜᱟ ᱚᱪᱚ ᱞᱟᱹᱜᱤᱫ ᱥᱚᱱᱛᱷᱟᱞᱤ ᱵᱚᱨᱱᱚᱢᱟᱞᱟ ᱵᱽᱭᱚᱵᱚᱥᱛᱷᱟᱯᱚᱱ ᱴᱤᱢ ᱨᱮᱱ ᱨᱟᱹᱥᱤᱭᱟᱹ ᱵᱤᱡᱚᱭ ᱢᱩᱨᱢᱩ ᱣᱟᱜ ᱜᱚᱲᱚ ᱛᱮ ᱯᱩᱛᱷᱤ ᱦᱟᱹᱴᱤᱧ ᱦᱩᱭ ᱟᱠᱟᱱᱟ ।
ᱵᱟᱨ ᱪᱟᱸᱫᱚ ᱢᱟᱲᱟᱝ ᱠᱷᱚᱱ ᱜᱮ ᱜᱚᱲᱚᱭᱤᱡ (Facilitator) ᱥᱭᱟᱢ ᱦᱮᱢᱵᱽᱨᱚᱢ ᱟᱜ ᱟᱹᱭᱩᱨ ᱛᱮ ᱦᱟᱯᱛᱟ ᱨᱮ ᱵᱟᱨ ᱴᱷᱟᱶ ᱨᱮ ᱥᱚᱱᱛᱷᱟᱞᱤ ᱚᱞ ᱪᱤᱠᱤ ᱞᱤᱯᱤ ᱪᱮᱫᱚᱜ ᱠᱟᱹᱢᱤᱦᱚ ᱪᱟᱞᱟᱜ ᱠᱟᱱᱟ । ᱢᱮᱱᱠᱷᱟᱱ, ᱯᱩᱛᱷᱤ ᱨᱮᱱᱟᱜ ᱟᱱᱟᱴ ᱠᱷᱟᱹᱛᱤᱨ ᱪᱮᱛᱮᱫᱤᱭᱟᱹ ᱠᱚ ᱯᱟᱲᱦᱟᱣ ᱨᱮ ᱟᱹᱰᱤ ᱦᱟᱨᱠᱮᱛ ᱦᱩᱭᱩᱜ ᱠᱟᱱ ᱛᱟᱦᱮᱸᱱᱟ । ᱯᱩᱛᱷᱤ ᱦᱟᱹᱴᱤᱧ ᱛᱟᱭᱚᱢ ᱪᱮᱛᱮᱫᱤᱭᱟᱹ ᱠᱚ ᱞᱤᱯᱤ ᱪᱮᱫᱚᱜ ᱞᱟᱹᱜᱤᱫ ᱟᱞᱜᱟ ᱦᱩᱭᱩᱜ-ᱟ ᱢᱮᱱᱛᱮ ᱟᱸᱥ ᱫᱚᱦᱚ ᱟᱠᱟᱱᱟ।
ᱯᱩᱛᱷᱤ ᱦᱟᱹᱴᱤᱧ ᱠᱟᱹᱢᱤᱦᱚᱨᱟ ᱨᱮ ᱜᱚᱣᱨᱤᱜᱚᱸᱡᱽ ᱜᱟᱶᱯᱟᱞᱤᱠᱟ ᱨᱮᱱ ᱢᱟᱲᱟᱝ ᱠᱟᱨᱭᱚᱯᱟᱞᱤᱠᱟ ᱨᱟᱹᱥᱤᱭᱟᱹ ᱡᱮᱴᱷᱟ ᱢᱩᱨᱢᱩ, ᱵᱤᱫᱽᱭᱟᱞᱚᱭ ᱵᱽᱭᱚᱵᱚᱥᱛᱷᱟᱯᱚᱱ ᱥᱚᱢᱤᱛᱤ ᱨᱮᱱ ᱯᱟᱨᱥᱮᱛ ᱴᱮᱠ ᱵᱚᱦᱟᱫᱩᱨ ᱞᱤᱢᱵᱩ, ᱟᱹᱛᱩ ᱨᱮᱱ ᱥᱚᱢᱟᱡᱽᱥᱮᱵᱤ ᱫᱷᱚᱨᱢᱚ ᱯᱨᱚᱥᱟᱫᱽ ᱫᱟᱦᱟᱞ, ᱜᱚᱝᱜᱟᱨᱟᱢ ᱢᱩᱨᱢᱩ ᱮᱢᱟᱱ ᱠᱚ ᱥᱮᱴᱮᱨ ᱠᱚ ᱛᱟᱦᱮᱸ ᱠᱟᱱᱟ।
‘ᱥᱚᱱᱛᱷᱟᱞᱤ ᱵᱚᱨᱱᱚᱢᱟᱞᱟ’ ᱯᱩᱛᱷᱤ ᱥᱤᱨᱡᱚᱱ ᱢᱤᱰᱤᱭᱟ ᱯᱨᱟ. ᱞᱤ. ᱨᱮᱱ ᱯᱟᱨᱥᱮᱛ ᱥᱤᱵᱩ ᱢᱩᱨᱢᱩ ᱟᱨ ᱵᱩᱫᱷᱞᱟᱞ ᱠᱤᱥᱠᱩ ᱛᱤᱠᱤᱱ ‘ᱥᱤᱨᱡᱚᱱ ᱢᱤᱰᱤᱭᱟ ᱵᱩᱠ ᱥᱴᱳᱨ’ ᱯᱟᱦᱴᱟ ᱠᱷᱚᱱ ᱵᱤᱱ-ᱜᱚᱱᱚᱝ ᱛᱮ ᱠᱤᱱ ᱮᱢ ᱟᱠᱟᱫᱟ।
ᱟᱹᱛᱩ ᱦᱚᱲ ᱠᱚᱣᱟᱜ ᱞᱟᱹᱭ ᱞᱮᱠᱟᱛᱮ ᱥᱟᱱᱛᱟᱲᱤ ᱯᱟᱹᱨᱥᱤ, ᱞᱤᱯᱤ ᱟᱨ ᱞᱟᱠᱪᱟᱨ ᱵᱟᱧᱪᱟᱣ ᱞᱟᱹᱜᱤᱫ ᱥᱟᱶᱛᱟ ᱟᱯᱚᱱ ᱛᱮᱜᱮ ᱠᱩᱨᱩᱢᱩᱴᱩ ᱨᱮ ᱢᱮᱱᱟᱜ-ᱟ। ᱟᱭᱳ ᱟᱲᱟᱝ ᱟᱨ ᱚᱞ ᱪᱤᱠᱤ ᱞᱤᱯᱤ ᱪᱮᱫᱚᱜ ᱟᱨ ᱱᱟᱶᱟ ᱯᱩᱥᱛᱚ ᱴᱷᱮᱱ ᱱᱚᱣᱟ ᱨᱮᱱᱟᱜ ᱜᱽᱭᱟᱱ ᱪᱟᱞ ᱨᱮᱱᱟᱜ ᱨᱤᱠᱟᱹ ᱦᱩᱭᱩᱜ ᱠᱟᱱ ᱨᱮᱦᱚᱸ ᱱᱚᱣᱟ ᱨᱮ ᱞᱳᱠᱚᱞ ᱥᱚᱨᱠᱟᱨᱟᱜ ᱞᱟᱹᱠᱛᱤᱭᱟᱱ ᱫᱷᱭᱟᱱ ᱟᱨ ᱜᱚᱲᱚ ᱞᱟᱹᱠᱛᱤ ᱢᱮᱱᱟᱜ-ᱟ ᱢᱮᱱᱛᱮ ᱠᱚ ᱞᱟᱹᱭᱟ ।
ᱞᱳᱠᱚᱞ ᱥᱚᱨᱠᱟᱨ ᱥᱟᱱᱛᱟᱲᱤ ᱟᱭᱳ ᱟᱲᱟᱝ ᱟᱨ ᱚᱞ ᱪᱤᱠᱤ ᱞᱤᱯᱤ ᱵᱟᱧᱪᱟᱣ, ᱯᱟᱥᱱᱟᱣ ᱟᱨ ᱪᱮᱫᱚᱜ ᱠᱟᱹᱢᱤᱦᱚᱨᱟ ᱯᱟᱦᱤᱞ ᱫᱷᱭᱟᱱ (Priority) ᱮᱢ ᱞᱟᱹᱠᱛᱤ ᱢᱮᱱᱟᱜ-ᱟ ᱢᱮᱱᱛᱮ ᱟᱹᱛᱩ ᱦᱚᱲ ᱠᱚ ᱫᱟᱵᱤ ᱟᱠᱟᱫᱟ। ᱥᱟᱶᱛᱟ ᱨᱮᱱᱟᱜ ᱟᱯᱚᱱ ᱨᱤᱠᱟᱹ ᱛᱮ ᱦᱩᱭᱩᱜ ᱠᱟᱱ ᱯᱟᱹᱨᱥᱤ ᱵᱟᱧᱪᱟᱣ ᱟᱵᱷᱤᱭᱟᱱ ᱨᱮ ᱥᱚᱨᱠᱟᱨᱤ ᱜᱚᱲᱚ ᱟᱨ ᱞᱟᱹᱠᱛᱤᱭᱟᱱ ᱥᱟᱯᱟᱯ ᱠᱚ ᱮᱢ ᱫᱟᱲᱮᱭᱟᱜ ᱠᱷᱟᱱ ᱱᱚᱣᱟ ᱨᱮᱱᱟᱜ ᱞᱮᱛᱟᱲ ᱟᱨ ᱚᱨᱥᱚᱝ ᱵᱟᱹᱲᱛᱤᱜ-ᱟ ᱢᱮᱱᱛᱮ ᱟᱸᱥ ᱫᱚᱦᱚ ᱟᱠᱟᱱᱟ।
ᱥᱟᱱᱛᱟᱲᱤ ᱯᱟᱹᱨᱥᱤ, ᱞᱤᱯᱤ ᱟᱨ ᱞᱟᱠᱪᱟᱨ ᱵᱟᱧᱪᱟᱣ ᱨᱮ ᱟᱹᱛᱩ ᱥᱟᱶᱛᱟ ᱨᱮᱱᱟᱜ ᱠᱩᱨᱩᱢᱩᱴᱩ ᱥᱟᱶᱛᱮ ᱞᱳᱠᱚᱞ ᱥᱚᱨᱠᱟᱨ ᱟᱜ ᱜᱚᱲᱚ ᱦᱚᱸ ᱟᱹᱰᱤ ᱜᱮ ᱞᱟᱹᱠᱛᱤᱭᱟᱱᱟ ᱧᱮᱞᱚᱜ ᱠᱟᱱᱟ।
खबर पढेर तपाईलाई कस्तो महसुस भयो ?
प्रतिकृयाहरू (0)
तपाईंले प्रतिकृया दिन लगइन गर्नुपर्छ।
लगइन गर्नुहोस्