इबोला संक्रमण तीव्र बन्दै, मृत्यु संख्या १३१ पुग्यो — WHO द्वारा अन्तर्राष्ट्रिय जनस्वास्थ्य आपतकाल घोषणा

सरकार बास्के

अफ्रिकाका केही क्षेत्रमा फैलिएको इबोला भाइरस संक्रमण तीव्र रूपमा फैलिन थालेपछि विश्व स्वास्थ्य संगठन (WHO) ले यसलाई “अन्तर्राष्ट्रिय जनस्वास्थ्य आपतकाल” (Public Health Emergency of International Concern - PHEIC) घोषणा गरेको छ। विशेषगरी Democratic Republic of the Congo र Uganda मा फैलिएको दुर्लभ “बुन्डिबुग्यो” (Bundibugyo) स्ट्रेनका कारण हालसम्म कम्तीमा १३१ जनाको मृत्यु भएको अन्तर्राष्ट्रिय सञ्चारमाध्यमहरूले जनाएका छन् ।

प्राप्त विवरणअनुसार ५ सयभन्दा बढी शंकास्पद संक्रमित फेला परिसकेका छन् भने संक्रमण सीमावर्ती क्षेत्र हुँदै अन्य स्थानमा समेत फैलिन थालेको छ। यो दुर्लभ स्ट्रेनका लागि हालसम्म स्वीकृत खोप वा विशेष उपचार उपलब्ध नभएको WHO ले जनाएको छ।

WHO का महानिर्देशक Tedros Adhanom Ghebreyesus ले संक्रमणको गति र विस्तार अत्यन्त चिन्ताजनक रहेको बताउँदै अन्तर्राष्ट्रिय समुदायलाई सतर्कता अपनाउन आग्रह गरेका छन्। मे १६ मा WHO ले प्रकोपलाई PHEIC घोषणा गर्ने निर्णय गरेको थियो, जसको सार्वजनिक घोषणा मे १७ मा गरिएको हो।

स्वास्थ्य विज्ञहरूका अनुसार इबोला संक्रमित व्यक्तिको रगत, पसिना, बान्ता तथा अन्य शारीरिक तरल पदार्थको प्रत्यक्ष सम्पर्कबाट सर्ने गर्छ। ज्वरो, कमजोरी, बान्ता, झाडापखाला तथा रक्तश्राव यसको प्रमुख लक्षण हुन्।

इबोलाबाट बच्ने उपाय

• साबुनपानीले नियमित रूपमा हात धुने

• बिरामी व्यक्तिको शारीरिक तरल पदार्थको सम्पर्कबाट टाढा रहने

• मास्क तथा सुरक्षात्मक सामग्री प्रयोग गर्ने

• जंगली जनावरको असुरक्षित मासु सेवन नगर्ने

• ज्वरो, बान्ता वा रक्तश्रावजस्ता लक्षण देखिए तुरुन्त स्वास्थ्य संस्थामा जाँच गराउने

स्वास्थ्य विशेषज्ञहरूले अफवाह र भ्रामक सूचनामा विश्वास नगर्न तथा आधिकारिक स्वास्थ्य निकायबाट जारी सूचनालाई मात्र आधार बनाउन आग्रह गरेका छन्। उनीहरूका अनुसार जनचेतना, सरसफाइ र सावधानी नै इबोला नियन्त्रणको सबैभन्दा प्रभावकारी उपाय हो।