बेरोजगार युवालाई ‘ककरोच’ भनेपछि सुरु भयो नयाँ राजनीतिक आन्दोलन

झापा, भारतमा व्यंग्यात्मक शैलीमा सुरु गरिएको “ककरोच जनता पार्टी (CJP)” अहिले सामाजिक सञ्जालमा चर्चाको केन्द्र बनेको छ। आम आदमी पार्टीका पूर्व सामाजिक सञ्जाल रणनीतिकार अभिजीत दीपकले सन् २०२६ मे १६ मा स्थापना गरेको उक्त आन्दोलन भारतका प्रधानन्यायाधीश सूर्य कान्तको विवादास्पद अभिव्यक्तिपछि जन्मिएको बताइएको छ।

सन् २०२६ मे १५ मा सर्वोच्च अदालतको सुनुवाइका क्रममा प्रधानन्यायाधीश सूर्य कान्तले बेरोजगार युवाहरूलाई “ककरोच” र “समाजका परजीवी” सँग तुलना गरेको भनाइ सार्वजनिक भएपछि सामाजिक सञ्जालमा तीव्र प्रतिक्रिया देखिएको थियो। त्यसको भोलिपल्ट अभिजीत दीपकले “सबै ककरोचहरूको साझा प्लेटफर्म” भन्दै CJP घोषणा गरेका थिए।

“आलसी र बेरोजगारहरूको आवाज” भन्ने नारासहित सुरु गरिएको आन्दोलनले छोटो समयमै ठूलो समर्थन पाएको दाबी गरिएको छ। सन् २०२६ मे २१ सम्म CJP ले इन्स्टाग्राममा १ करोड २० लाखभन्दा बढी फलोअर्स तथा X मा १ लाख ५० हजारभन्दा बढी समर्थक जुटाएको बताइएको छ। साथै, ३ लाख ५० हजारभन्दा बढी व्यक्तिले अनलाइन सदस्यता लिएको दाबी गरिएको छ।

राजनीतिक रूपमा व्यंग्यात्मक देखिए पनि CJP ले केही औपचारिक एजेण्डासमेत सार्वजनिक गरेको छ। पार्टीले आफूलाई “धर्मनिरपेक्ष, समाजवादी, लोकतान्त्रिक र अल्छी युवाहरूको मोर्चा” का रूपमा व्याख्या गरेको छ।

यस आन्दोलनले बिहार, उत्तर प्रदेश, मध्य प्रदेश, जम्मू–कश्मीर र हिमाचल प्रदेशलगायत राज्यहरूमा चर्चा पाउन थालेको छ। बिहारको बाँकीपुर विधानसभा उपनिर्वाचनमा आफ्ना समर्थकमार्फत उम्मेदवार उठाउने तयारी भइरहेको भारतीय सञ्चारमाध्यमहरूले जनाएका छन्।

विवादपछि प्रधानन्यायाधीश सूर्य कान्तले आफ्नो भनाइ गलत रूपमा प्रस्तुत गरिएको स्पष्ट पार्दै आफूले नक्कली डिग्री प्रयोग गरी कानुनी क्षेत्रमा प्रवेश गर्ने व्यक्तिहरूको आलोचना गरेको बताएका छन्। उनले भारतीय युवाहरू देशको भविष्य भएको समेत उल्लेख गरेका छन्।

यता, अभिजीत दीपकले भने कुनै पनि पदमा बसेको व्यक्तिलाई नागरिकलाई “परजीवी” भन्न नैतिक अधिकार नभएको प्रतिक्रिया दिएका छन्।